مؤتمر دولي عشان حل الدولتين، قرارات ومقررات وباريس وما أدراك ما باريس، يعني الشانزلزيه وبرج إيفل وماركات وأنا شخصيا نفسي أقول "كنت في باريس"، بس للأسف ما تحققت الأمنية، وباريس هاي الأيام جوها حلو وصافي، بس مش شرط إنه الجو يكون صافي يعني يطلع مقررات صافية، أو بتنفع للتطبيق، يعني يعطيها العافية فرنسا وكمان السعودية حاولوا يساعدونا، يعني يفرضوا على هالعالم اللي داير ظهروا إلنا إنه في لهلمساكين حق يكون إلهم كيان ومكان وزمان يعيشوا فيه، بعد ٧٨ سنة من التشرد والترحال من زاوية لزاوية ومن دولة لدولة ومن مخيم لمخيم، لكن المشكلة ما انحلت والمشكلة هي إسرائيل، وإسرائيل مش شايفه حد، وليش تشوف حد ما دام أمريكا معها، يعني معقول معي "أزعر" الحارة وبقولي أنا معك وبدي أسال بالباقي، زمان قالوا إنه الأسد غاب عن الغابة، نط الأرنب وقال "أنا الزعيم الجديد واللي مش عاجبه يجي ورا الشجرة ويشوف شو بعمل فيه". زمجرت النمور والفهود والفيلة، قالوا للنمر روح شوف هالقصه معقول أرنب يحكمنا؟  راح النمر ورجع إيده مكسورة وراسه بِشُر دم، رجع الأرنب وقال "اللي مش عاجبه إني أكون زعيم يجي ورا الشجرة"، راح الفهد ورا الشجرة رجع مكسورات إيديه الثنتين، الجميع اطلع بالفيل وقالولوا ولو وأنت أكبر حجم وأضخم جثه والأرنب يحكمنا؟ راح الفيل رجع خرطومه مقصوص وبلولح، الجميع استغرب شو هالقوه اللي صارت مع الأرنب فجأة، بعد شوي طلع الأسد من ورا الشجرة وقال "حد معترض على الأرنب اللي أنا عينته". هاي هي المعادلة، بدك تفرض دولتين حقك، بس اتأكد إنه المشكله مش في إسرائيل المشكله في أمريكا اللي لا شايفه أوروبا ولا شايفه العرب، أما إسرائيل فحلها بسيط، الحل إنه "الأزعر" يرفع إيده عنها ويقولها التزمي، أما القرارات والمقررات فإسرائيل شايفها حبر على ورق بدون فايدة .